大約﹣又﹣冬季！

大家覺得天氣慢慢轉涼

秋意漸濃的時候

我們踏入了冬季，周日下了整日雪

來不及翻箱倒篋找冬天衣服鞋襪

發現Luca的大衣跟雪鞋都穿不下

昨日上學，還是照樣穿上便鞋，多穿兩件上衣

連室內暖氣都啟動了

十月就迎接冬天，是不是早了點呢？

就是冬天的突襲

很多小朋友都病倒了

Luca小朋友都咳了一晚，可憐的待在家

還有兩日

我們又可以返回夏天的家

今躺Luca爸都可以回港抖抖

歎歎點心

還要去生果店朝聖

庫頁島購物﹣樂﹣！

跟其他太太閒聊

話題總離不開日常買餸煮飯

去邊到可以買到特別食材

大家（非俄國背景太太）總是抱怨

我們總要去上幾個不同地點才能買到所要的東西

例如買魚的話，要走去魚市場

但那個魚市場又買不到新鮮菜蔬和鮮肉

買到鮮肉那個市場又沒有魚，菜選擇又少

去超市的話，蔬菜，水果，選擇少，又沒有魚和肉

還要特別去買厠紙，洗衣粉

等等等等.....

那Local人的購物習慣呢？

所以上面特別high-light

抱怨的只有外國人

對於本地人來說

他們甚至可以在一個地點把起居生活，衣食住行全包辨

例如這家店：

美國太太想買隻鑊

旁邊一位大嬸正在挑選內褲.....

又或者，你想買個爐頭，順便試對鞋，買多條絲巾都得

還是買微波爐？床單？毛巾？還是內褲......

定係買洗衣機？衣車？？

備註，以上幾張相只係呢間店的一角

向前行幾步有電腦，電視，相機，printer，攪伴機，雪櫃，冷氣，手袋，

杯碟...............但成間店只係一千呎！

Luca小朋友上學去

大家好！Happy Friday 啊！

這兩星期的大事

就當然是Luca小朋友正式上學去呢！

終於，不用再上俄文學校

我們一家人都期待以久

庫頁島國際學校今年全校只有一百四十個小朋友

學校行英國制，由Pre-nursery 到Ｐ８一共十班

沒有俄國人

四歲的Luca小朋友上Nursery班，下一班就是P1

Pre-nursery有十二位小朋友　（半日課）

Nursery 只有四位小朋友（連Luca在內﹣全日課）

課室的一角

Nursery還有一個遊戲室，洗手間，lockers，小型室內球場，戶外遊樂場

這樣的設施在香港是沒有可能呢！

課室另一角

上學的第一個星期

參加了同班一位同學的生日會

四十多個小朋友為一個四歲孩子慶生

很多孩子都不認識那壽星女

我只覺得這樣的生日會無意思

是媽媽之間的俾面派對吧？！

返學返得開心，我們都放下心頭大石

雖然學校很遠

而且Luca每日都只食半盒Pack-lunch 

(如果要食晒整盒lunch的話就沒有時間去玩！）

不過我們都替Luca小朋友開心呢！

又返嚟啦！

又好耐無見啦，希望各位博友都好！

我們返上島兩個幾星期啦

捱了整個星期Jet-lag

Luca小朋友上星期終於返返學

Luca媽又自由了！！

（這兩個星期都是俄文學校

要到五號才開始返國際學校

當然，我們都很期待呢！）

自由的Luca媽除了日日開車之外

當然就是去振興本土經濟啦！

除了一般食物日用品開支之外

甚少在島上買衣服鞋襪

反而，廚房用品會買得多

雖然不是什麼fancy的東西

不過，跟太太友人們四出尋寶都幾有趣

近日，Luca媽的新目標

就是這種俄國傳統瓷器Gzhel

每一件都是手造

在花下面還有製造者的簽名

很多俄國家庭都有一套Gzhel茶具呢

其實Luca媽的收藏都不是很多

起碼沒有買杯

找來找去都找不到一個有扥的旦糕盤

上星期買的這個茶壺和小碟，十分喜愛呢！

就用小茶壼來沖泡French Earl Grey, 特別香！

歸心似箭

仲有兩日就回程返上島

此刻心情，竟然是急不及待！

不是刻意要抺黑我家99大人

不過兩星期的日夕相對

真係難頂

雖然我已經括出去，接受兩星期無私隱

但每個人的容忍都會有個限度

我可以忍佢俾好多糖Luca小朋友食

但到夜晚9點仲食糖係咪有點過份？

佢仲會話：你地可以見住佢成年，我見佢兩個星期

咁唔係你見得佢少就可以為所欲為呀？

日日都走嚟問我打算俾咩佢食

大佬，好似呢度係你屋企，你先知有咩可以俾佢食

我去買嘢整俾佢食你又唔Like

咁點先？

99大人仲要有滿瀉的好奇心

成日唔出聲在我個手袋度㨩嘢

我個袋無拉鍊你都出聲問下先攞嘢啦！

仲惡頂啲的仲有

例如食完第一輪嘢，佢個煲到仲有剩

問我要不要

我答：唔要

佢會問：你肯定？

我再答：係呀，唔要啦，唔該！

佢會同佢個仔講：你問下你老婆佢要唔要？

頂！係咪我啲法文真係咁差，佢連我講NON都唔識聽？

佢個仔答佢：佢頭先咪話咗唔要囉！

佢就話：我聽唔到佢話唔要喎！

頂！

然後每當佢問Luca小朋友要唔要呢樣嗰樣而Luca答唔要的時候

佢就會好有骨咁講

Luca好似佢阿媽咁，話咗唔要就係唔要架啦！

頂！

再惡頂啲？

發生在今朝，話說在我房內有一袋污漕衫

打算帶返去先慢慢洗（反正仲有兩日就走，呢度又落雨，又係啲底衫褲）

佢問我地有冇衫要洗

我話無

佢就走上房打開啲袋搵

然後成袋拎走

唔好意思，你尊重吓人家的私隱好嗎？

我唔會因為你好心打開我個袋拎我啲衫出嚟洗晒佢而感動

仲要大條道理話我好帶啲衫返去洗？

嬲爆！

好啦，好唔好意思要大家聽我的一輪勞唆

多謝多謝！

日本手信﹣Cotton Time 七月號

有太太朋友去日本玩

送來手信七月號Cotton Time

嘩！！

即時開心到彈起

一齊睇下有咩手作Project

她建議做其中一個旅行包

做得起我下星期就可以用啦！

所需時間不長，工作量不多

可是勁傷腦筋

用了兩個下午時間

終於完成！

做這個包最貴是條拉鍊

因為我的stock沒有４８cm拉鍊

所以要去買

成為港幣三十蚊

係呀，三十蚊一條拉鍊，真係有問題！

倒數中

終於

把月曆上六月份那三十格都畫去了

七月一日

倒數十日

連Luca小朋友每日都問幾時執行李

幾時去尖沙咀買旦糕食壽司

連頭髮都剪好

（Luca婆婆話，唔剪好頭髮唔可以返香港，因為香港太熱啦！）

加上每日返學都會經過一塊韓亞航空廣告牌

Luca小朋友一定心急到發癲

當然，Luca媽都十分心急

很期待一切美食，媽咪靚湯，行街shopping......

今次在島上連續四個月，好似過左成年咁長

幸好幸好，Luca媽在四月的時候

心野野地買了部新車（又新車！上一部是十月......）

當然，心裡是有點內疚的

不過，每當一想到有好幾個月留在島上

加上在這裡買車一般比外面平三成

好啦，係值得的！

所以，沒有update個blog的日子

Luca媽多數是埋首車前

這幾個月做了兩條褲給Luca小朋友

還有很多大大小小不同的東東.....

下面是六月搞作

有一堆小錢包，中間是為聖誕義賣的掛飾

還有夏天購物袋

做手作，時間過得特別快

星期五

又到星期五啦！

每逢星期五

Luca小朋友都會做逃學威龍，跟日本好朋友玩一個上午

兩個孩子都十分期待周五的來臨

可是一見面，吵㗎，打交，爭玩具，又喊又笑

我們兩個媽媽都十分期待這個聚會

每次為對方做不同的食品

雖然語言上不是十分容易交流

不過每次見面都是十分充實，非常開心

難得的好朋友，七月就要回生ＢＢ，十月便要搬到新的地方

希望他們一家人平安，快樂！

數數星期五，還有三個星期五，我們又起程回港啦！

可能是天氣不好的原故

今次在島上三個月，好像過了很長的日子

漫漫長

加上Luca爸忙得要命

每周我們只有周六周日能一起晚飯

唉！

當然，在香港這個情況很普遍

Luca媽細個時候，阿媽阿爸又不是為兩餐只有周日有時間陪屋企

我這樣的投訴不是多餘吧

就好似法國的姑媽跟我們說她工作很忙要ＯＴ

那個很忙ＯＴ都不過是有幾日七點收工而已（平時五點）

Anyway,悶到發霉的Luca媽很多時都window shopping

當然不是在商場（這裡都沒有商場）

而是在網上周圍look

寫定shopping list

踏入倒數回港真令人興奮

今次只有兩星期，兩星期後在首爾機場會合Luca爸

返鄉下探阿爺阿嫲。。。。。。。

小Luca進化論之繼續進化

原來上星期五，是Luca小朋友幼稚園畢業禮

唔怪得星期四阿老師對住我好多野講

好可惜，Luca媽唔明

只知道佢要我三點半去接Luca而已

又好可惜，每個星期五Luca都會唔返學

逃學去跟日本小友人玩

終於，這個星期一上學

在課室門口見到老師

又同我講左好多野

好彩捉到一位識點點英文的媽媽

佢話呢班小朋友升左班

所以要去新課室，跟新老師

新老師看來ＯＫ，至少沒有低胸衫和皮裙（連幼稚園有一半女人是這樣打扮！）

打招呼後送來Luca的第一張Diplom!

好可惜，Luca媽除了認得那紅色大字是Diploma和Luca個大名之外

其他都睇唔明

＊＊＊

新學年第一日接Luca小朋友放學

Luca媽很好奇這班新班跟舊的有何不同

可能有教學，縮短午睡時間之類

問Luca：「你今日下午瞓覺瞓左幾耐呀？」

Luca想想，然後答：「１０耐！」

Luca媽：「吓！.........咁即係幾耐呀？」

＊＊＊

好好彩，新班只是新老師跟新課室，同班同學不變

所以，Luca第二日都很順利地上學

第二朝，我們的心情都不錯

Luca媽就醒Luca珍藏的好立克糖

Luca小朋友一見到，當然好開心

好快手就拿了一粒，然後話：「嘩！！係口立濕糖呀！」

Luca媽：「吓？咩話？咩糖話？」

Luca慢慢地，好自信地重複：「係﹣口﹣立﹣濕﹣糖！」

Luca媽即時笑死左

小Luca進化論

上星期四

我們去了薩哈林唯一的國際學校參觀

並跟校長見面

校長是英國人，校內有一百四十位不同國籍的小朋友

提供由三歲起的nursery，到十二歲的Ｐ８（即係香港的中二）

學校的設施很好（當然比起美人魚奶稚園來說，更是天堂）

有泳池，有球場，跟香港國際學校相約

終於，Luca小朋友唔駛再讀俄文啦！

今年９月，Luca就可以返學讀Nursery 2

開始真正的學習生活

不經不覺，Luca已經三歲半

今日帶他出街，非常開心的他

一邊行一邊唱歌

一首我們都未聽過的歌

Luca爸竟然揶揄Luca的俄文唔正

我想，Luca能明白的俄文一定比我多

這段日子的笑料，都是Luca的中文

例如打電話俾婆婆，婆婆問佢係邊位

佢會答：「係呢個位同埋嗰個位」

咁即係邊位呀？

又或者問佢幾點鐘（因為佢好鍾意戴錶）

Luca，依家幾多點？

Luca答：「依家係五十點」

如果問，Luca，依家幾多點鐘？（多左個鐘字）

Luca答：「依家係三三鐘」

即係話，Luca小朋友知道個article 量詞係點用？

例如問，Luca，呢架車幾多錢呀？

Luca答：「呢架要十錢！」

真係唔知好嬲定好笑

＊＊＊

他除了講中文好笑，有時講英文都有好多笑料

多得thomas, Dora, Diego呢Ｄ卡通

特別是Thomas，讓Luca學了不錯的英文

而且他識的生字不少

一日，我們如常地在巴西太太家下午茶

Luca好自然地告訴巴西太太

"I want a coffee with milk, please!"

下午茶過後

我跟巴西太太在研究我們的手作仔

巴西太太拿着手縫針，又要穿珠針

為方便便暫時用口含住

Luca見到便走過來，很認真的看着她說：

“Ｍonica! You can't eat that!

It's very dirty!!”

我們都大笑了出來

雖然，很多時Luca小朋友不太容易，頑皮，不聽話

不過，有時想想，他的確幾乖

特別是乖乖的上本地學校

帶他去街去朋友家作客他都很規距

正如國際學校校長話，香港家長要求很高，孩子很早入學

連這兒的校長都對香港怪獸家長有所聞

香港家長原來這麼出名！！

難得可愛 chebarushka -下

我的Chebarushka,就是唱這首歌啦！

難得可愛 chebarushka -上

在俄國生活了兩年

在俄國人的字典入面

不存在可愛

連裝扮小孩子，都只有靚和唔靚

他們不會把孩子穿得可愛

Luca有頂青蛙造型的帽，在香港人人叫可愛

這兒的人只會冷冷的看着他

可能覺得他，或者我好stupid

俄國唯一可愛的東西

可能是Cheburashka Чебурашка​ 

)

昨日跟朋友去街

無意中找到這隻價錢公道的Chebarushka

(因為一般在手信店禮品店都賣得幾貴）

而且，他還會說話和唱歌

講講歷史吧，chebarushka其實是1966年的產物

作者Eduard Uspensky

帶有soviet union蘇聯feel的卡通

跟Chebarushka 一起的，還有他的朋友Gena

一隻會拉手風琴的鱷魚

Chebarushka在零四年奧運開始

成為了俄國隊的吉祥物

可見這隻可愛的小動物在俄國的地位甚高

若大家有機會來俄國旅行

除了買俄國套娃做手信之外

（可是很多流言話這些套娃現在都是大陸造）

可以考慮買Chebarushka

復活節soup kitchen

雖然俄國是東正教為主

不過島上都有一所天主教堂

太太團有一位十分熱心的天主教徒

她不是要推人入教，而是找義工幫手

外表不錯的教堂，入面其實十分簡單

牆上掛上德籣修女的相

教堂有幾位不同國藉的修女

從她們的裝束，令人不其然想起德籣修女

教堂每逢一，三，五的下午

都會為有需要的人，派發午餐﹣soup kitchen（其實係late lunch,因為是下午四點）

而幫手的義工，都是外國太太

我沒有真正幫手soup kitchen

只是偶然去幫忙包裝食物

聽聞東正教復活節有二百人的午餐活動要多些幫手

那我又去幫手順道見識下

＊＊＊

我們的太太團另外準備了二百支果汁，復活節旦糕，和四百隻彩色旦

午餐四點開始，我們兩點到達

一到埗，就要開始準備坐位，食物

在枱上的都是頭盤，每人有兩隻旦，一件旦糕，兩件面包，一支果汁，一杯yogurt

然後，廚房入面便忙着準備主菜

有二百隻大鷄腿，一個大膠箱裝滿紅菜頭沙律

一個大膠箱滿的薯容

＊＊＊

四點，他們終於出現

食物在十五分鐘內清枱

之前分菜時剩下的沙律和薯容可再加

我跟另一位太太出去幫手

忙碌之間，湧來強烈酒氣，多時沒有洗澡的體味

他們的眼神都很脆弱

他們都很餓

看見我們還有大量食物

他們都爭着要

有些還帶來膠袋把食物帶走

聽不懂俄語，我覺得這時候是好的

懂俄語的一位太太

人人都問她要錢，問她很多問題

有太太說，這些人都只是一，三，五才會食飯

有錢，都去買酒

＊＊＊

東正教的復活節旦糕

似意大利的聖誕旦糕

超市的復活節裝飾

好好計劃

法國太太要返法國五個月

其實是回國待產

沒有外國人在庫頁島生仔

一來幫ＢＢ搞證件要山長水遠去返莫斯科

二來島上醫療設備極之落後

連腎石都要去首爾醫，島上沒有磁力共振素描設施

連五個月地中海貧血驗血都沒有

所以，有身孕的太太們都要有好好的計劃

還包括ＢＢ出世後要打的針

肺炎鏈球都冇得打

其實Luca媽在Luca小朋友三歲開始已經有打算追多個

不過總是左想，右又想

法國太太臨走前，拋下一句

想咁多做咩，想咪要囉......都唔明你做咩想咁多

佢講就容易

沒有外國人想得到，在香港生仔係會咁煩

三年前在法國生Luca

醫院是Perfect

但要對住奶奶大人五個月，我寧願唔生

再有ＢＢ的話，一定要返屋企

可是，在香港生仔好似完全不容易

似打仗一樣，要同國內人迫

一位美國太太朋友三年前在明德醫院生

當然她極力推介

還有她在中環的婦科醫生

她很奇怪我會這麼擔心...

我家住新界，雖然是開刀，但都唔會摸上山頂啦

就是這個醫院的問題

強迫我們要好好計劃

萬一真係中左，就要立即趕返香港搵醫生book床位

好似仲難搞過買機票book機位

唉！

廚房機械人

法國太太要返法國五個月

問我要唔要接收佢部KitchenAid

因為平時要整面包旦糕

我都好懶地去搵佢呢部廚房機械人幫手

不過借用就唔好啦

希望第日有機會可以買一部啦！

真係有型有款㗎！

可惜成廿幾磅重

香港同法國都賣得好貴

呢部新款在美國都唔駛五百美金

在法國要六百幾歐羅

在呢個島上面，就當然沒有這東東啦

法國太太都係跟一位要搬走的美國太太買二手

五月十四日

如常一個星期六

Luca不用上課，可以懶床

看看時間，差不多９點

是時候起身了

加上Luca小朋友在大半個鐘頭前已經坐在我床邊

做左人阿媽，可以懶床的機會真的很少

打開窗簾，外面又係白茫茫

心想......討厭......

雪，幾時先會落完？

今日係五月十四日

昨日落了整日雪

今日再落

當然，有人會十分興奮......

重回島上人

大家好！好耐冇見啦！

希望各blog友一切都好

返上島一個月有多

生活依舊，雪照落

會慢慢update俄式生活！！

重見...光明

人心惶惶

對愚昧中國人搶鹽搶奶粉搶米搶日貨不作回應

只覺羞恥

在庫頁島上俄國人都人心惶惶

居民都準備逃難北上

雖然官方話輻射率正常

不過

各公司海外員工的家屬很多都返國去

我們圍內太太們都相繼離開

只希望

黑暗盡快過去

期待重見光明的日子

俄人俄事﹣二

下星期就是三八婦女節

一般在香港都是婦女團體搞些活動

不過廣大婦女的生活仍是正常，沒有特別優待

在俄國，三月八日婦女節卻是假期

家中的男士要給女士送花，煮飯

男孩子要給老師送花

女士在這天享受一天當公主或皇后

有婦女節women's day,就當然有男士節men's day

俄國男士節men's day叫做Army Day

每年二月二十三日都是假期

因為俄國男士都要服兵役

所以順理成章army day即係男士men's day!

講完俄事，又講下俄人吧

相信大家都有印象

俄國人的姓，不是咩咩咩咩夫，就是咩咩咩咩娃

同一個姓在男姓名字結尾會是vich, ev,

在女姓名字結尾加"a"

除了在姓氏可知性別，還可以估到這家族的來源

 

俄國姓氏係幾特別，不過俄國人對改名就沒有創意

下面是一堆非常common的名

在我們身邊同名的人非常多

你在街上大叫Andrei或Marina

不難有幾廿人回應

Alexis

Andrei

Anatoli

Dimitri

Igor

Sacha

Sergey

Vladimir

Yuri

Anya

Alina

Eugeyena

Elena

Galina / Halina / Kalina

Luyda

Natasha

Masha

Marina

Vera

俄人俄事

不經不覺

在這俄國小島生活接近兩年了

身邊有太太們更住上了五年，七年

我們的感覺都差不多是一樣

是習慣了？是麻木了？

兩者都差不多吧.....

兩年以來認識了／接觸過不同本地人

奇怪的是

這個民族的人都是大同小異

例如，

差不多９９﹪以上的俄人，都是木口木面，冰冰冷的

因為，俄人認為，對不認識的人表現友善

是傻人的表現

當大家認識的日子長了

他們都會流露友善的一面

俄人，都很愛弄權力，愛爭權，愛話事，愛出風頭

上至經理級，下至清潔工，都很有尊嚴權力

當人人都要有權，要話事的時候

就會發生口角，衝突，這些都是家常閒事

就如Luca小朋友要上本地學校

公司人事部一位外型似蜜蜂的俄女說是她負責

還大大聲把我們點來點去要什麼什麼文件手續

兩個月兩個月地追，兩個月兩個月地過去

這位蜜蜂女在六個月後發難話學校的事officially不是她工作範圍內喎！

又或者清潔工話事要把洗手間關起來清潔

你就可以預計整日，甚至好幾日沒有廁所用

這些爭事做最後難尾的事日日都發生

依家我們頭痕的事，是關於那個三年新簽證

話說去年十一月簽證部話Luca老豆的passport不夠十八個月有效

（他有十七個月囉！）

口口聲聲要他換新

在法國辦護照的人員當然不肯給我們換新的

俄國要我們的護照有十八個月有效及三張空頁，是不合國際入境法

搞了一排，又要公司信，最後都搞好

舊簽證四月尾到期，應該有三年不用續吧

最後這位簽證小姐竟然搞錯用了那十七個月有效passport來續一年證

你話係咪嬲都爆！

要講俄人，真係講幾日都講唔完

俄人雖然外冷，但內心愛國團火燒得火紅

對國家，對民族，都十分驕傲

法國太太對人權問題很好奇

一日，她問一位要好的俄國太太

關於俄國記者被殺一事

俄國太太年輕，而且一向都很洋化，英文流利

講起記者被殺這事

她竟然為國家講說話........

當然，這無損大家友誼

只是，大家心中有數，知道俄國跟大陸始終都是friend，一蟹不如一蟹

大家估下下面這張相在哪裡拍的？？？？？

大會堂？警署？

都不是！！

是Luca日日都返的美人魚幼稚園啊！！！！！！！

請大家向總統行禮！

一一年二月尾

不經不覺，Luca返了差不多一個月學

上星期開始，Luca更在學校食埋午餐，瞓埋覺先返屋企

突然放監的Luca媽完全是上了天堂一樣

一日有六個小時自由時間都唔知點用好

只係覺得洗錢快左同埋多左......

無他

日日跟其他太太們吃喝玩樂

突然做返個自由人

真係可以從深心裡笑出來！

當然，可苦了Luca小朋友

在一個語言不通的情況下活六小時

我估佢一舉一動都係跟大隊

老師話食飯佢就食，去瞓就瞓，去洗手間就去

難怪日日放學返嚟都要發下大小脾氣發發洩

不過返埋下星期學，我地又放監返香港啦！

係呀，我地一月中才從香港返嚟

三月又返過去？

我們都沒有辨法，原定四月才返

不過Luca老豆的工作實在有太多變數

多年來我們都學懂了即時行樂和being flexible

可以放假就當然放左先，在這公司沒有人可計劃未來

永遠都是Last minute

所以

朋友們，

我們十日後又見面啦！

呵呵呵呵

Luca 上學去！

今日係大年初一

首先祝大家

兔年行大運，事事順景，心想事成！

農曆年我們都沒有特別慶祝

只是昨晚團年飯比平日豐富而已

送虎迎兔，對三歲的Luca是最特別的開始

因為由上周三起

他開始了幼稚園生活

第一日上學是開心的

（當然Luca媽是擔心的，語言不通，文化不同）

之後的幾日，雖然不太容易

但大哭不夠三十秒就給玩具轉移了視線

這是幼稚園正門，學校挺大，學生由兩歲半到六歲

美人魚幼稚園　（Ru-Sal-Lish-Ka)

厚厚積雪，零下十五度

不過每班都要在外面玩一小時

我在外面行五分鐘都凍到鼻麻痺

Luca的班房在地下，可以在外面入

開門，除鞋

首先入儲物房，每位小朋友都有一個儲物櫃

白色門進入班房

其實Luca媽都不清楚這班學生有幾多

十多位吧

昨日，跟我們一起上學的媽媽朋友（會俄語）告訴我

老師問她，叫Luca"坐下"的英文點講.......

怪不得小朋友們都坐定定等食中午飯

只有Luca在走來走去

這日，小朋友們在午餐中

今日，十二點，Luca媽如常去接Luca

Luca食完飯，老師帶他出來

他跟老師講 Ma-la-did (俄文的very good)

然後，Pa-ka, Pa-ka　離開

Luca媽 O 晒咀

車車車

自從出左埃瘋４之後

部相機都唔知去左邊

昨晚跟朋友們晚飯時

美國太太帶來一部剪sim card機（外型似釘書機）

問我要MTC（俄羅斯vodafone)的sim card

二話不說「啪」一聲

就幫我把local張sim card剪好，真感激！

那我可以帶住部電話出去晒晒

返嚟兩星期了

因為外面太凍，連雪都落不出

今早起身零下三十度

每次外出都凍到面痛，連流鼻水都冇知覺

Luca又開始返學

唯有在屋企開下車

加上十二月返香港在淘寶買了很多工具布布

希望可以捱到四月啦！

這兩星期的作品有：

Luca的書包

（其實書包不是用來裝書，而是他的雪褲）

還給我的工具一個家，做了個工具袋

還車了第一件手作衫（未影相....熨好照照大家睇）

還有幾塊lunch mats

每次開車，Luca媽都盡量在Luca午睡時

可是午睡時間有限

Luca醒來就會走過來話

"媽媽又開mixeur呀！"

（可能Luca覺得衣車的聲和搞拌機相似？！）

然後在我身邊搞下線，吉下針

就去玩火車

昨日整完lunch mats，今日再唔知可以整咩............

可怕的機場炸彈恐怖襲擊

今早起來

第一單新聞就是莫斯科最忙機場的恐怖襲擊

隨即想起好友應是同一時間在莫斯科轉機回島

現在滯留到周五才回來

然後公司立即發出員工指引

所有在俄員工及其家屬

在２４號打後兩周內

要取消所有前往莫斯科Domodedovo機場和Sheremetievo機場的計劃

只批准前往莫斯科Vnokoko機場，而且還要是如非必要

請勿前往莫斯科

現在人心惶惶

希望不要再有其他襲擊再發生

自私的當權者為了自己國家利益不讓小國獨立

自私的小國想獨立就去濫殺其他人

一一年法國之行十六天

還有三日就返香港啦！

好可惜，我們只能逗留廿四小時

周一起程，周二晚到，周三晚走

今趟法國十六日行沒有大活動

我們零消費零外出

可憐Luca小朋友悶到抽筋成日嚷住要出街

昨日趁阿爺有事要去Bretagne 最大城市Rennes 一趟

我們當然跟住去

開了兩個幾鐘高速

食個午餐，我們趁他們去做事的時候四圍走走

鄉下人的兩老覺得城市太多人多車惡頂

我們終於能沾沾人氣

可惜不是Rennes的舊城區而是周邊區

沒有景點

最後五點幾開車七點返到屋企

又回復漆黑

法國一年一度的大減價，在某些省區開始了

可是不是這兒（都不大問題，反正要去買點好野都要成兩個鐘車）

每次返嚟我們帶走的都是食物，藥物

所以減價影响不大

（當然如果是去巴黎的話，講法就大不同啦！）

今次會帶走的，除了四公斤乾火腿，pate罐頭食物

Bretagne的糕餅，herbe de provence, mustard 之外

還有下面呢個：

參考過其他品牌

最後選了這個有可調較時間及顯示的

試用過才拿回去

第一次弄了nature原味

沒有用下面那盒ferment

只要一杯nature的乳酪加一公升奶

八小時後，再送入雪櫃

成品令人滿意！

我們不用再捱庫頁島貴價乳酪了！

祝各位新年快樂！！

遲來的祝福

二零一一年

祝大家新年快樂，身體健康！

在香港過了十天假期

平安夜晚起程來法國

這兒的聖誕跟往年一樣

大豆有一大堆玩具

我們有生蠔海鮮鵝肝乾柴火鷄木頭旦糕

唯一跟往年不同的

是Luca媽大傷風

很久沒有這麼病

還有奶奶大人日日吟吟吟

真係超惡頂

還要捱多一個星期才可以返屋企

（Luca媽要訴苦真係要寫幾編都寫唔完，D火上晒頭，連牙較都疼埋！）

希望今年先苦後甜吧！

再祝大家事事順利，身體健康好重要！