Thursday, December 17, 2009

香港地.......

在香港HEA了差不多三星期
只覺得自己勁OUT
有時候會想想留在香港
有時候又會慶幸自己不是住在香港

就好似今早,在電梯跟一位六十有多的鄰居閒聊
(我是不認識這鄰居的!)
阿大嬸問,我是否帶Luca上學
我說,他才兩歲,我們只是落街走走
阿大嬸就話:「我阿孫女都係兩歲啦,响九龍糖咩咩幼稚園返緊學啦!
你那個兩歲都唔返學,第日入唔到小學架......」
我只係答:「哦!係呀?」
就繼續走

呢一刻,又再慶幸Luca不用在香港上學
*****
今次返嚟,𡃁模熱潮減退
換來是一街龍友(即沙龍發燒友)
香港經濟不好,街上大袋細袋名牌都係普通話人
原來時下香港潮人不再shopping
而是注資在相機業
街上無論是男是女,梗有一大部大相機,一大支三腳架

就好似琴晚去老尖同Luca公公慶祝生日
在某酒店自助餐
我拿着碟,正想去拿蠔之際
一位OL拿着部十分之大的相機,不斷為生蠔們拍寫真
另一面,又有一位哥仔正在為甜品拍寫真
當時心想
兩位仁兄未見過生蠔,未見過甜品嗎?

飯後沿海旁步行到Harbour City
海旁的吸引力明顯不夠Harbour City的聖誕裝飾強
那海港城入口人山人海(昨晚都只不過是星期三晚!)
三腳架把行人路都攔住
龍友對聖誕裝飾的瘋狂程度
只能用恐怖來形容

香港,好似變得越來越恐怖!

Tuesday, December 8, 2009

elle est ou la gourmette?!

返嚟已經個半星期,時間過得好似好快咁
坦白講,真係唔想再走來走去
聖誕節可唔可以唔返法國,去日本玩幾日啦?
(呢個心底話,只敢在呢度發表......唉)

其實應該忙着為Luca爸的家人(係,依家都係我的家人)
買聖誕禮物
不過,都仲未去買

收到Luca爸轉發過來Luca嫲嫲的電郵
話說Luca阿嫲在Luca出生時訂造了條18K金手鍊給Luca
(即係好似我們給BB買金器的傳統)
Luca阿嫲對我一直沒有給Luca戴上有微言
咁貴重一條金鍊放埋一邊唔戴?
我只覺得,給一個BB戴手鍊只會對BB造成不便
而且18K金沒有什麼大不了
我們24K金不是更保值?
當然,慣性屈服的Luca媽在Luca一歲多時戴上這條鍊
不經不覺仲戴左幾個月

突然有天鍊扣鬆開了
Luca媽把鍊收起.........

到現在,又好多個月過去了
我們都由南半球搬回北半球
講回阿嫲的電郵
當然是要拿回金鍊加長修好再戴

但暫時Luca媽對金鍊的location毫無頭緒
唯有努力諗努力搵下啦

Wednesday, December 2, 2009

好貴的香港!

離開香港,都只是半年
不過每次回來,都總是很不同

今次回來,家人朋友們都問,可有覺得物價貴了?
這幾日外出食飯,食店價錢沒有大分別,不過份量比以前少得明顯
日常必需品都貴了
衣服鞋襪更不在話下

另一樣叫Luca媽驚訝的
是國內旅客真係多得恐怖
Luca婆婆埋怨
國內旅客來港購物
把香港貨品價錢推高

唉!都只能怪商戶乘機加價
某程度上
"多得"國內旅客來港消費來救助零售市場
不過.......國內旅客真係多得好恐怖
有時以為自己返左大陸!

所以,Luca媽回來趁大減價熱鬧的美好大計都得報銷