當局者迷

大家好嗎？原來已經四月

好宅的兩豆媽，驚覺時間的飛逝。。。。。

近來，佔據心神的，都是自己的手作網店

可能因為很有期望，當然會令自己失望

手作是自己控制

網店卻力不從心

由純粹做手作，變作做生意

真是兩回事

是自己產品有問題，是網店用字不夠好，是相片影得唔靚

還是再要投資多啲廣告

。。。。。

心很灰，有點當局者迷

問了各方親友意見

有朋友提議好好鑽研"product description" 

有朋友提議再影靚啲相

有朋友提議開pinterest, 開instagram

有朋友提議要努力寫blog。。。。。

很多marketing 的工作

我會盡量再俾心機！！

。。。。。

大家又有咩意見？

大小豆學校嘉年華

估不到今年冬天咁難過
兩豆同豆媽我，已經病左好多次
以前在阿塞拜疆同庫頁島都好似無咁多唔舒服。。。。。
。。。。
自去年十一月恐怖襲擊後，學校很多活動都取消了
上一篇是小豆家長日
然後是上周五的學校嘉年華
記得去年的學校嘉年華
大豆扮海盜
（係因為唔記得有嘉年華，豆媽要臨急跑返屋企是但拎一套衫）
每年都係在市內巡遊
可惜今年因為安全理由取消巡遊
今年大豆唔知扮咩
見屋企有條吹氣雙節棍就話扮小龍
臨急都唔知去邊到搵套黃衫
行晒成個商場，好不容易才找到黃褲，淨黃衫簡直是mission impossible
返到屋企仲要手縫黑邊

好彩大豆都好開心收貨

佢仲好鍾意件衫個閃電

咁小豆呢。。。

好彩幼稚園的裝扮都由老師搞掂

（可能怕佢地走失認唔出）

他們要貼題地用"樹"

會行的樹，是他們自己做的勞作

小豆家長日

遲來的小豆家長日

因為巴黎恐襲而延期的家長會面

老師只係講講小豆班的每日流程

幾多點大概會有什麼活動

Le Bourget 巴黎航空博物館

剛剛過去的二月假期

原本計劃好等兩豆爸第二星期放假便返老家探兩老

可是因為兩豆在第一星期假期時感冒

他們好返便到兩豆媽中招

因為兩豆爺爺三月中要做心臟手術

（所以計劃返去陪下佢散下心）

我們都有感冒不敢回去傳染他

所以最後兩豆爸的一星期假期都在巴黎過

。。。

兩豆媽我好耐無試過咁病

失聲幾日又發燒，成日都想瞓

趁好返好多的上星期四

加上終於停雨

又在好多個月前買了些半價入場卷

便去了離巴黎戴高樂機場不遠的Le Bourget機場旁邊的航空博物館

(Musée de l'Air et de l'Espace Le Bourget)

遲來的新年快樂！

親愛的blog友，大家好嗎？

很久沒有上來了，希望大家都好！

送上非常遲來的新年祝福

祝大家幸福滿載！

護膚品敗家@Look Fantastic

從來，對護膚品都不講究

可能自少皮膚問題不太多（自我感覺吧。。。）

隨著時間流逝，年紀增長，生活環境轉變

越來越覺得皮膚暗淡無光澤

加上搬來法國後皮膚變得非常乾

頭髮又立又沒有volume

是時候要出手

幾個月前有朋友介紹呢個英國網站

有國際免運費，非常吸引

上星期五下單

昨晚（星期三晚）就送到

Aveda Pure Abundance

這套洗頭水護髮素非常適合油頭的Luca媽

多年前用過好幾套

覺得貴要轉下

現在還是重投它的懷抱！

其他的貨品都是新入荷，未試過

JASON這支body lotion質感不錯，只是香味怪怪

法國都有好多品牌的body lotion

試過許多都未找到心水

＝＝＝

Korres是希臘品牌

又是玫瑰情意結吧

24小時保濕cream不錯

Luca媽塊面沒有再乾到柴咁

＝＝＝＝

KENT髮刷立即開嚟用

大愛

買了50鎊送了個禮盒

又是beauty box的玩意

原價要十幾歐

送左好多嘢

旅行裝好方便呢！

試用了左手面的髮cream和右手面的磨砂

都不錯

新品睇完

舊物呢。。。。其實白潤精華是返香港的時候買

剛剛開，好用呢！

但是各式Anti wrinkles的護膚品自己都受不了

由非常便宜的法國有機Anti wrinkles cream

到大眾化的Kiehl's

到Lancome 的Genifique

全部都不合用

用完皮膚非常乾和"鞋"。。。。。

太婆的奇遇

前兩日收到兩豆姨婆寄來的信

拆開，

竟然是法國國家足球隊教練和副教練的簽名名信片

。。。。。

事源某一晚零晨三點

在法國西北部某老人院內

兩豆太婆在熟睡之際，有人開門拍醒她。。。。

原來是另一位婆婆，就稱呼她婆婆A

婆婆A半夜三點迷路了

唔知自己去左邊

就是但入了一間房

正好是兩豆太婆間房，把她叫醒了

請求她帶自己返自己間房

＊＊法國老人院房間都有獨立洗手間和小廚房

        所以半夜尿尿或者肚餓都不用出房

。。。。。

半夜三更，濛濛瀧瀧，92歲的兩豆太婆

又點會有本事帶到婆婆A返去佢自己間房

所以，兩豆太婆就邀請婆婆A坐低飲啖水，傾下計

唔知兩位女士傾咩

因為半夜凍，傾傾下，兩個一齊在床上蓋住被，慢慢傾

。。。。。

傾到唔知幾多點

有護士巡房發現兩個妹妹半夜三更傾得咁開心唔瞓覺

了解件事後，便帶婆婆A返去

第二日，護士把事情告訴兩豆麻麻和姨婆聽

同時收到婆婆A的兒子打電話來道謝。

原來

婆婆A的兒子，就是法國國家足球隊的副教練來

而呢位副教練，兩豆阿爺曾經跟他做過隊友

（兩豆阿爺曾經好威，年青時在法國西北部其中一支勁旅Guingamp足球隊踢過，可惜因為交通意外，左眼失明，不能再踢，否則可能做左球星呢。。。）

所以副教練為左多謝太婆咁照顧婆婆A

就送左幾張簽名名信片給兩豆

還有張有齊全隊足球隊的簽名海報呢！

不過大豆話，佢一個球員都唔識

只係識巴黎聖日門隊的外藉球員Zlatan Ibrahimovic，哈哈哈！

又回歸啦！

各位親愛的博友好嗎？

希望大家都好！

暑假玩完，兩豆都開學了

Luca媽終於又回歸。。。。。

開學已經兩星期了

大豆升三年級

小豆都開始返幼稚園低B班

原來打算頭幾個月俾小豆返半日學慢慢適應

點知，第一日中午放學時已經唔肯返屋企

所以，第二日開始已經返全日了。。。。呵呵呵！

有八年沒有獨處的Luca媽

當然非常開心，終於有返自己的時間

。。。。。

至於大豆呢隻小學雞呢

今年的班主任是位男老師

希望會有另一種教學方法

令容易悶和易分心的大豆學得開心啲

暫時功課不多（對香港小朋友來講更加係無）

有時間可以讀英文

和學柔道呢

周日散步之幫朋友出血

由上星期三開始，又是一年一度法國夏季大減價

星期六一早

我們便到家附近的大型商場的超市入貨

入貨清單的日用品和食品都買好

大豆新學年的書包和日記本都買好

我們可以安心放假去！

Luca媽的清單內，要找一組放玩具的膠櫃

找來這組Made in Luxembourg 還打五折

十歐就帶了回家

兩豆都好開心呢！

另外帶了回家的

是期待已久的Staub 30cm鑊

自去年十月在Le Bon Marche見到減價86歐

因為太重拎不到

終於再見到減到86歐

真係又大又重

今次在商場的廚具店找到

不同坐地鐵帶回家

太幸福了！

因為是夏季大減價的第一個星期

所以巴黎市中心的大百貨公司都額外營業

所以，星期日我們就坐火車

今次是幫朋友出血

好幾位朋友指定要買Longchamp

星期六已經買了幾個，今日再買

朋友話，法國沒有減價，68歐那一款（沒有退稅）

香港要賣到1200港幣

真誇張！

暫時買了五個

想再買的朋友快落單

我們星期日就返香港啦！

今次散步的位置是Saint Sulpice

其實就在Le Bon Marche過兩條街，巴黎6區

一出Saint Sulpice地鐵站

後面就是Eglise de Saint Sulpice

兩豆都非常喜歡行教堂

所以一定要入來轉個圈

小豆準備緊舉V字。。。。

大豆好忙周圍望

原本出來想去La Maison du Chocolat

好可惜呢間分店無開門

走返去Saint Suplice

Rue Bonapart有間Laduree, 但兩位豆爺要吃雪糕

就在呢個時候，見到間Pierre Herme

兩豆老豆話佢唔識呢間嘢

香港好似好Hit

試了他家的名物

Macaron 雪糕

要了一杯檸檬雪糕配Macaron

一杯Vanilla

真係各有特色

七個幾一杯雪糕。。。。

另外還買了一盒七粒Macaron

很可愛的盒子

小豆三歲 － 24h du Mans 賽車

忙了一排，終於有時間返上嚟啦！

之前有朋自遠方來探我們

然後六月頭小豆三歲生日

上週末

爺爺嫲嫲過來慶祝

然後剛剛的週末

來個快閃去三小時車程的Le Mans探姑媽

順便睇賽車

Le Mans 24小時賽車原來已經第83屆

http://www.24h-lemans.com/live/en/ 

賽車在13號，星期六下午三點開始

賽足二十四小時

我們星期六早上十一點到

跟表妹玩完，晚飯後去了賽道的其中一段睇

原來要睇到賽車，不一定要去到場館

就算是沿途

都一定要買票

買了票，自己找張椅，想睇幾耐

想去邊到睇，都可以

當然要有好位置一定要趁早

好多人都在賽道旁露營

因為大小豆姑媽家距離賽道只有五分鐘

所以一整晚賽車聲都很吵

星期日一早起來

又出發去睇賽車

今次是賽車場館內

沿途好多靚跑車

買得七十幾萬歐羅車

當然提供埋酒店和shuttle

主入口

入到場內有很多不同攤位

似Fun Fair多啲

我們都要戴住耳塞，太吵呢

因為大小豆姑媽和男友都在Le Mans住和工作

所以每年都有機會睇到不同賽車

（有電單車賽，跑車賽，單車賽，連貨車賽都有）

有免費入場券，但上看台坐要另外收費

看台有Porsche看台，Audi看台，日產看台。。。。各有不同收費

我們很幸運，姑媽男友在Audi看台工作

所以免費睇左一陣

入維修站真係二十秒就返出嚟架！

捱不到三點賽事完畢

我們由十點睇到十二點

小朋友們都好乖

就返屋企食午飯

午飯後

趕在賽事完結鳥獸散前趕回巴黎

食完拉麵去散步－香榭麗舍

五月八日那個週末長假期

趁好天氣在星期六出巴黎食碗拉麵

地點依舊是Opera的Rue St Anne

食飽飽順便在韓超入點貨

就向香榭麗舍進發

轉兩個街口，過埋Rue Rivoli

就嚟到羅浮宮啦

難得大豆還肯俾個笑容

影相才發現他們兩個兄弟裝

Luca媽沒有刻意架

他們是自己揀衫的呢

連小豆都叫得出呢支柱係Concorde

多得大豆哥哥！

過左Concorde, 就來到香榭麗舍大道

上一次來

已經是四年前了

那時的大豆還在BB車瞓覺

正如今日的小豆。。。。。

又累又口乾，找不到星巴克

就來到HagenDaas

可能因為這日遊客太多

侍應跟我們講法文份外有禮，不用排隊好快就有位

大豆有雪糕食

小豆還在車仔午睡。。。

今日焦點

終於行到凱旋門

要叫醒小豆

兩豆都開始grumpy

就打道回府

。。。。